رییس کمیته اجرایی ساختار منطقه‌ای ضد تروریسم سازمان همکاری شانگهای (SCO) می‌گوید: «۱۳ هزار و ۵۰۰ تن از اعضای گروه‌های اسلام‌گرا» در امتداد مرز افغانستان و تاجیکستان تجمع کرده‌اند.
به گزارش افغان نیوز؛ اورسلا میرزایف، رییس کمیته اجرایی ساختار منطقه‌ای ضد تروریسم سازمان شانگهای این موضوع را روز سه‌شنبه (26 میزان) در نخستین روز نشست بین‌المللی «همکاری بین‌المللی و منطقه‌ای امنیت و مدیریت مرزها برای مقابله با تروریسم» در دوشنبه، پایتخت تاجیکستان، بیان کرده است.
میرزایف گفته است که این شمار از اعضای گروه‌های اسلام‌گرا که در امتداد مرز مشترک افغانستان و تاجیکستان حضور دارند، اعضای داعش را که رقم دقیق آن قابل تشخیص نیست، شامل نمی‌شود.
خبرگزاری آسیا پلاس تاجیکستان در ادامه گزارشش به نقل از میرزایف آورده است که در سال گذشته میلادی، یک هزار و ۵۰۰ فرد تحت تعقیب بازداشت شدند و از بیش از ۴۰ حمله تروریستی در کشورهای عضو سازمان همکاری شانگهای جلوگیری شده است.
در این نشست، امام‌علی رحمان، رییس جمهور تاجیکستان، تاکید کرده که برای پیش‌گیری از خطرات، ایجاد یک کمربند امنیتی در اطراف افغانستان ضروری است.
به گفته او، تروریست‌ها از خاورمیانه به افغانستان منتقل می‌شوند و فعالیت گروه‌های تروریستی در این کشور تهدیدی جدی برای آسیای میانه است.
این نشست دو روزه با همکاری سازمان امنیت و همکاری اروپا، تاجیکستان، دفتر مبارزه با تروریسم سازمان ملل، اتحادیه اروپا، عربستان سعودی و قطر در شهر دوشنبه، پایتخت تاجیکستان، برگزار شده است.
این در حالی است که روز گذشته عبدالسلام حنفی، معاون رییس الوزرای امارت اسلامی نگرانی کشورهای منطقه و جهان را نسبت به تهدید از افغانستان بی‌جا خوانده و گفت که هم اکنون امنیت کامل در کشور تامین شده است.
پیام ها