چین دومیلیون ین چینایی به افغانستان کمک کرد

به گزارش افغان خبر: تفاهمنامه همکاری دومیلیون ین چینایی جمهوری خلق چین به ریاست اجرائیه با حضور داشت دکتور عبدالله عبدالله رئیس اجرائیه کشور، توسط عبدالقهار عابد رئیس دفتر ریاست اجرائیه و یاوجینگ سفیر جمهوری خلق چین در افغانستان، بعد از ظهر روز دوشنبه (25عقرب) در قصر سپیدار به امضاء رسید.

دکتور عبدالله عبدالله رئیس اجرائیه، جمهوری خلق چین را از همکاران استراتژیک افغانستان نام برده و از حمایت های آن کشور قدردانی نمود.

دکتور عبدالله عبدالله اضافه نمود: معاون رئیس جمهور چین در سال 2015 سفری که در افغانستان داشت، همکاری امروزی را که شامل تجهیرات اداری و تخنیکی میباشد به حکومت افغانستان وعده نموده بود که امروز شاهد تحقق آن هستیم و این یک گام دیگر در راستای تحکیم روابط نیک میان دو کشور میباشد.

رئیس اجرائیه در ادامه صحبت هایش اشاره نمود:"جمهوری خلق چین دوست و از حامیان نیک افغانستان بشمار میرود، که کشور ما را در عرصه های متعدد از جمله تامین صلح و ثبات، بازسازی، مبارزه با تروریسم، سرمایه گذاری، تجارت و ترانسپورت حمایت نموده است".

وی همچنین تاکید ورزید که همکاری ها میان دو کشور در حال گسترش و تحکیم بیشتر میباشد.

یاوجینگ سفیر جمهوری خلق چین در افغانستان گفت: همکاری امروزی جمهوری خلق چین گوشه ی از حمایت های کشور اش از افغانستان میباشد.

وی تاکید نمود که جمهوری خلق چین طرفدار توسعه روابط نیک در عرصه های مختلف با افغانستان است و به اصل حسن همجواری حرمت میگذارد.

محترم یاوجینگ علاوه نمود: که جمهوری خلق چین متعهد است به همکاری اش در افغانستان درعرصه های مختلف با توجه به نیازمندی حکومت افغانستان ادامه دهد.