نگرانی مسکو از افزایش فعالیت‌های تروریستی در افغانستان
به گزارش افغان نیوز؛ سرگئی شویگو، وزیر دفاع روسیه، روز چهارشنبه(۶، اسد) در دیدارش با شیرعلی میرزو، همتای تاجیکستانی خود خروج نیروهای خارجی به ویژه نیروهای امریکایی از افغانستان را عجولانه خواند.
وی افزود که این عمل‌کرد شتاب‌زده باعث وخامت سریع اوضاع در افغانستان شده و کنترل این وضعیت نیاز به اقدامات ویژه دارد.
آقای شویگو گفته است: «امروز، کار مشترک برای خنثی سازی تهدیدات از خاک همسایه‌گان افغانستان مورد توجه قرار گرفته است.»
در همین حال، وزیران دفاع روسیه و تاجیکستان در مورد وضعیت امنیتی در مرز افغانستان و تاجیکستان و اقدامات مشترک برای رفع تهدیدهای مرتبط با جنگ در افغانستان گفت‌وگو کرده‌اند.
اسپوتنیک می‌نویسد که روسیه در تاجیکستان یک پایگاه نظامی ایجاد کرده و به شدت نگران بدتر شدن وضعیت در افغانستان است.
بر اساس اطلاعات نشر شده، قرار است که روسیه، تاجیکستان و ازبیکستان ماه آینده در مرز میان تاجیکستان و افغانستان مانور نظامی مشترک اجرا کنند.