افغانستان محور گفتگوی تلفنی رییسان جمهور روسیه و تاجیکستان

به گزارش افغان نیوز؛ خبرگزاری دولتی تاجیکستان« خاور» گزارش داده است که ولادیمیر پوتین، رییس جمهور روسیه امروز( سه‌شنبه، 13 میزان) با رییس جمهور تاجیکستان تماس تلفنی داشته و دو طرف بر امنیت منطقه، تقویت مادی و فنی حافظت از مرز تاجیکستان با افغانستان تاکید کرده اند.

رهبران دو کشور توافق کرده اند که پس از این در مورد وضعیت افغانستان به تماس‌های منظم خود ادامه دهند.

در این تماس تلفنی رییس جمهور روسیه افزون بر گفتگو، تولد امام علی رحمان، رییس جمهور تاجیکستان را تبریک گفته است. روسیه پیش از این از افزایش تنش میان تاجیکستان و طالبان ابراز نگرانی کرده بود.

این در حالی است که پس از تنش میان تاجیکستان و طالبان، چند روز پیش مسوولان طالبان در شمال کشور به ویژه بدخشان از ایجاد واحدهای نظامی استشهادی در شمال شرق افغانستان برای حفاظت از مرزهای افغانستان خبر داده بود.