گفتگوی رییسان جمهور فرانسه و تاجیکستان در مورد افغانستان
به گزاش افغان نیوز؛ امانوئل مکرون، رییس جمهور فرانسه به خبرنگاران گفته است که تاجیکستان با افغانستان مرز مشترک طولانی دارد و « ما در رابطه به این کشور دغدغه‌های مشترکی داریم».
رییس جمهور فرانسه گفته است که با رییس جمهوری تاجیکستان در مورد کمکی که فرانسه می تواند به این کشور برای تثبیت اوضاع در افغانستان انجام دهد، صحبت می‌کند.
امام علی رحمان گفته که تاجیکستان فرانسه را «شریک قابل اعتماد» در اروپا می داند.
رییس جمهور تاجیکستان پیشتر از تجمع گروه‌های تروریستی در مرز جنوبی تاجیکستان شکایت کرده و اخیرا یک نشان افتخاری را به احمدشاه مسعود، فرمانده پیشین ضد طالبان در افغانستان اعطا کرده است.
همچنین گزارش شده که تاجیکستان به رهبران مقاومت علیه دولت طالبان نیز پناه داده و از آنها حمایت کرده است.
امام علی رحمان از سال‌ها به این سو مواضع سختگیرانه‌ای علیه اسلامگرایان تندرو و سرکوب جنبش‌های اسلام‌گرا در داخل کشور خود دارد، به تا حدی که این امرموجب نگرانی فعالان حقوق بشری شده است.
در حال حاضر فرانسه و تاجیکستان دو کشوری اند که مخالفت شدید خود را علیه دولت امارت اسلامی طالبان در افغانستان آشکارا اعلام کرده‌اند.
هر دو کشور پیشتر گفته‌اند که رژیم طالبان را به خاطر رفتار این گروه در برابر زنان و فراگیر نبودن حاکمیت شان به رسمیت نمی‌شناسند.
دعوت فرانسه از آقای رحمان در کاخ الیزه نشانه مهمی است که فرانسه معتقد است کشورهای منطقه می‌توانند در بحران افغانستان نقش ایفا کنند.
مکرون گفته است: «نباید با گروه‌های تروریستی و ارزش هایی که ما از آنها دفاع می کنیم، به ویژه حرمت به حقوق زنان، سازش شود".
این در حالی است که کشورهای همسایه افغانستان، از جمله ازبکستان، مدتها پیش با طالبان ارتباط برقرار کرده‌اند، مقامات تاجیکستان از همکاری با گروه طالبان خودداری کرده‌اند.