پوهنتون‌های دولتی به‌زودی بازگشایی می‌شوند

به گزارش افغان نیوز؛ انعام‌الله سمنگانی، معاون سخنگوی امارت اسلامی، امروز سه‌شنبه(۲۳، قوی) در برگه توییترش نوشته است که معاون سیاسی ریاست الوزرا این موضوع را در دیدار با شماری از استادان پوهنتون‌ها مطرح کرده است.

 وی به استادان اطمینان داد‌ه که به پیشنهادات و خواست‌های شان رسیدگی و همه پوهنتون‌های دولتی به زودی باز می‌شوند.

معاون سیاسی ریاست الوزرا همچنان تصریح کرده که به منظور جلوگیری از فرار کدرهای علمی، کارهای عملی آغاز شده است.

این درحالی است که امرالله صالح، معاون رییس جمهور پیشین کشور، روز دوشنبه(۲۲، قوس) در برگه فسبوک‌اش نوشت که اگر نظام مشروعیت داخلی و بین المللی نداشته باشد، مغزها و ظرفیت‌های انسانی فرار خواهند کرد.

بیش از سه ماه از حاکمیت طالبان بر افغانستان می‌گذرد اما هنوز هم دروازه‌های پوهنتون‌های دولتی به روی دانشجویان باز نشده و این مسئله شماری از محصلان را نسبت به آینده‌شان ناامید کرده است.