امریکا هواپیماهای حکومت پیشین را به تاجیکستان واگذار خواهد کرد

به گزارش افغان نیوز، جنرال مایکل کوریلا، فرمانده مرکزی ارتش امریکا«سنتکام» روز دوشنبه(30 جوزا) در تاجیکستان گفته که این وسایط قطعا به افغانستان بازگردانده نخواهند شد.

خبرگزاری رویترز از قول این جنرال امریکایی گزارش داده که امریکا تصمیم دارد شماری یا همه این هواپیماها را در اختیار تاجیکستان قرار دهد.

جنرال کوریلا گفته است: «هدف ما این است که بتوانیم برخی یا همه هواپیماها را به حکومت تاجیکستان واگذار کنیم. من جدول زمانی که چه وقت این اتفاق خواهد افتاد را ندارم اما؛ سخت تلاش می‌کنیم تا این کار را انجام دهیم».

کوریلا از نیروهای امنیتی تاجیکستان به‌خاطر نگهداری از این هواپیماها قدردانی کرده و گفته که با دولت تاجیکستان در مورد استفاده موثر و نگهداری از این هواپیماها همکاری می‌کند.

مقام‌های امارت اسلامی از جمله ملا یعقوب، سرپرست وزارت دفاع امارت اسلامی بارها از تاجیکستان خواستار بازگردان هواپیما‌ها و چرخلباهای ارتش به افغانستان شدند.

این در حالی است که با سقوط نظام پیشین خلبان‌های افغان برای نجات جان خود با ده‌ها هواپیما و چرخبال‌های ارتش به تاجیکستان و اوزبیکستان فرار کردند.