پلیس قندهار:

پاکستانی‌های غیرقانونی در قندهار بازداشت می‌شوند

به گزارش افغان خبر: ضیا درانی سخنگوی فرمانده امنیه ولایت قندهار گفته است که برای تأمین امنیت بیشتر شهروندان کشور، تمام اتباع غیرقانونی پاکستان بازداشت خواهند شد.

او افزوده است که تا اکنون 150 تن از شهروندان پاکستانی که اکثرشان از ایالت پنجاب آن کشور هستند گرفتارشده و در نظارت پلیس قرار دارند.

وی در ادامه گفت: پلیس این عملیات را جهت برقراری امنیت آغاز کرده است و این تا زمانی ادامه خواهد یافت که تمام شهروندان غیرقانونی پاکستانی بازداشت شوند و دوباره به کشورشان بازگردند.

پیش‌ازاین جنرال عبدالرازق فرمانده پلیس قندهار گفته بود که به دلیل بدرفتاری حکومت پاکستان و بیرون کردن مهاجران افغان از آن کشور، وی نیز عمل بل مثل انجام می‌دهد و تمام شهروندان پاکستانی که مدارک قانونی ندارند را از ولایت قندهار خارج می‌کند.

بااین‌حال باشندگان قندهار نیز از این عمل پلیس استقبال کرده و میگویند که با بیرون شدن کارگران خارجی زمینه‌های کاری برای کارمندان افغان بیشتر می‌شود.