تاجیکستان تا مرز افغانستان راه‌آهن می‌سازد
به گزارش افغان نیوز؛ رسانه تاجیکستانی «آسیا پلاس» امروز (شنبه، 13 اسد) از قول وزارت ترانسپورت این کشور نوشته است که این قرارداد روز سه‌شنبه هفته گذشته (9 اسد) بین کشورهای تاجیکستان و کوریای جنوبی در دوشنبه امضا شده است.
به گزارش این رسانه، عظیم ابراهیم، وزیر وزارت ترانسپورت کشور تاجیکستان گفته است هدف اصلی این پروژه دسترسی به بازارهای کشورهای جنوب آسیا (افغانستان، پاکستان و هند) است.
ابراهیم تاکید کرده است که در صورت عملی شدن این طرح، حمل و نقل کالا در منطقه افزایش می‌یابد و این هم برای تاجیکستان و هم برای کشورهای منطقه بسیار مفید خواهد بود.
در همین حال، «جئون سونگ-سیک سئول»، دیپلومات سفارت کوریای جنوبی در دوشنبه گفته است این پروژه که اولین اقدام این کشور برای ساخت راه‌آهن در آسیای مرکزی است تاجیکستان را به دریا وصل خواهد کرد.
وزیر ترانسپورت تاجیکستان هزینه ساخت این پروژه را 4 میلیون دالر امریکایی اعلام کرده و ابراز امیدواری کرده است که کار ساخت آن تا سه سال آینده تکمیل شود.