صدور جواز فعالیت برای ۷۲ سازمان غیردولتی از سوی وزارت اقتصاد

به گزارش افغان نیوز: عبدالرحمان حبیب، سخنگوی وزارت اقتصاد، گفته است که در سال ۲۰۲۵ میلادی، یک سازمان غیردولتی خارجی و ۷۱ سازمان داخلی در این وزارت ثبت و جواز فعالیت دریافت کرده‌اند.

به گفته‌ی وی، قطع کمک‌های ایالات متحده امریکا در افغانستان بر فعالیت سازمان‌های غیردولتی تأثیر گذاشته و در پی آن، شماری از این نهادها بخشی از برنامه‌های خود در بخش کمک‌های بشری را کاهش داده‌اند.

سخنگوی وزارت اقتصاد هم‌چنان افزوده است که در حال حاضر، در مجموع ۲ هزار و ۵۸۸ سازمان غیردولتی به‌شمول ۲۰۰ سازمان خارجی در وزارت اقتصاد ثبت می‌باشند.

در همین حال، شماری از آگاهان اقتصادی فعالیت سازمان‌های غیردولتی را در بهبود وضعیت معیشتی مردم کشور مهم ارزیابی کرده و تأکید دارند که کمک‌های بشری باید از مسائل سیاسی جدا نگه‌داشته شود تا بتواند به‌گونه مؤثر به نیازمندان برسد.