تاجیکستان در نزدیکی مرز افغانستان اقدام به مانور نظامی کرد

به گزارش افغان نیوز: تاجیکستان یک مانور گسترده نظامی سه روزه را در قلمرو منطقه خود مختار کوهستان بدخشان واقع در نزدیکی مرز کشورمان آغاز کرده است.

فریدون محمد علیزاده رییس دفتر مطبوعاتی وزارت دفاع تاجیکستان به رسانه ها گفته است، تاجیکستان بخاطر جلوگیری از نفوذ تروریزم از طریق افغانستان به این کشور به این مانور نظامی آغاز کرده است. او میگوید: وظیفه اصلی اشتراک کنندگان این مانورنظامی مبارزه با تروریزم و نابودی آنها میباشد.

وی خاطرنشان ساخت، استراتیژی محاصره و از بین بردن نفوذ تروریزم بین المللی در قلمرو این کشور نیز جزء این مانور نظامی میباشد.

رییس دفتر مطبوعات وزارت دفاع تاجیکستان گفته است که این تمرینات به فرمان شیرعلی میرزا وزیر دفاع آن کشور اجرا میگردد. او میگوید که  حدود یکصد وسایل نقلیه زرهی، طیاره و تجهیزات نظامی دیگر مورد استفاده قرار می گیرد.

این درحالی است که مقامات تاجیکستان از نفوذ احتمالی گروه تروریزم از افغانستان به قلمرو این کشور نگرانی شان را اعلام کرده گفته است که در دوماه گذشته فعالیت گروه تروریزم درولایات کندز، تخار و بدخشان افغانستان با ولایت ختلان و بدخشان تاجیکستان که هم مرز هستند، تشدید یافته و امنیت این کشور را به خطر مواجه میسازد.