شیرخان بندر به روی افغانستان بسته شد

به گزارش افغان نیوز: سید مجتبی هاشمی، رییس اتحادیه تاجران در ولایت قندوز می‌گوید که دولت تاجیکستان علاوه بر تاجران، برای افغان‌های که گذرنامه‌های سیاسی ندارند، نیز اجازه ورود را به آن کشور نمی‌دهد.

وی می‌گوید که تا هنوز هیچ یک از یک مقام‌های دولتی افغان و تاجیکستان، در مورد مشکلات تاجران کشور اقدام نکرده و دلیل این کارشان نیز روشن نمی‌‌باشد.

شیرخان بندر یکی از بزرگ‌ترین بندرهای صادراتی و وارداتی افغانستان‌ست که اموال تجاری، تاجران افغان از این بندر به کشورهای آسیا میانه، صادر می‌گردند.

در عین حال، نعمت‌الله تیموری، سخن‌گوی والی قندز در این مشکل پیش‌آمده‌ می‌گوید که دولت تاجیکستان به دلیل آماده‌گی برای جشن سال نو میلادی، مرز شیرخان بندر را مسدود کرده‌است.

وی جزئیات بیش‌تر دراین مورد نه داده و این را هم واضح نساخته‌است که شیرخان بندر تا چه زمانی به روی تاجران مسدود خواهد بود.

به اساس اطلاعات به دست آمده از تاجران افغان در شیرخان بندر که اموال شان را به خارج از کشور صادر می‌کنند، با مسدود بودن این مرز، روزانه ده‌ها میلیون افغانی، خساره می‌کنند.

گفتنی‌ست که این برای اولین بار در جریان یک سال اخیر است، که تاجیکستان مرز شیرخان بندر را به روی افغان‌ها می‌بندد.