باید یک فهرست واضح از ملکیت‌های دولتی ترتیب شود

به گزارش افغان نیوز: جسلۀ که به ریاست محمد اشرف غنی، رییس جمهور کشور در ارگ برگزار گردید، چگونگی پیشرفت طرح استفاده از ملکیت‌های انتقال‌شده از اتحادیه‌ها و سازمان‌های اجتماعی مورد بررسی قرار گرفت.

یکتن از مسئولین ریاست عمومی املاک دولتی وزارت مالیه گفت که اتحادیۀ ملی کارکنان افغانستان(امکا)، اتحادیۀ نویسندگان، اتحادیۀ کوپراتیف‌های دهقانان و اتحادیۀ جوانان، از جمله نهادهای اند که بیشترین جایدادهای غیرمنقول دولتی در اختیارشان قرار دارد و از آن استفادۀ ابزاری، سیاسی و شخصی می‌نمایند که باعث حیف و میل‌ ملکیت‌های غیر منقول دولتی می‌شود.

موصوف، معلومات مفصل در مورد ملکیت‌های انتقال‌شده، جمع‌آوری عواید از ملکیت‌های متذکره و منفعت غیرقانونی از عواید ملکیت‌های دولتی توسط مسئولین اتحادیۀ کوپراتیف‌های دهقانان و اتحادیۀ جوانان ارائه کرد و طرح وزارت مالیه را در خصوص استفاده از ملکیت‌های انتقال‌شدۀ دولتی، بیان نمود.

رئیس‌جمهور غنی از زحمات ریاست عمومی املاک دولتی وزارت مالیه تشکر کرده، گفت که باید یک فهرست واضح از ملکیت‌های دولتی در کابل و ولایات ترتیب شود تا بعد از شناسایی و تثبیت دقیق آن، انتقال یابند.

آقای غنی به معین ارشد امنیتی وزارت امور داخله، قوماندان گارنیزیون کابل و قوماندانان امنیۀ ولایات هدایت داد تا در زمینۀ تثبیت ملکیت‌های متذکره با وزارت مالیه همکاری نمایند.