رییس جمهور تاجیکستان می‌گوید که خاک افغانستان منبع تهدیدها و چالش‌های مدرن است و کشورش خط نخست مقاومت علیه این تهدیدها است.
به گزارش افغان نیوز؛ امام علی رحمان، رییس جمهور تاجیکستان روز گذشته( چهارشنبه، 12 عقرب) در بیانیه‌ای گفته است که خاک افغانستان همچنان منبع گسترش تهدیدها و چالش‌های مدرن است و تاجیکستان که مرزی طولانی با این کشور دارد، در خط مقدم مقاومت در برابر آن‌ها قرار دارد.
رییس جمهوری تاجیکستان در این بیانیه گفته است که بحران عمیق سیاسی، نظامی، اقتصادی و اجتماعی در افغانستان بر نگرانی‌های جامعه جهانی افزوده و باعث ایجاد تنش در منطقه شده‌است.
امام علی رحمان از آمادگی کشورش برای تسهیل روند کمک‌رسانی به افغانستان خبر داده و گفته که تاجیکستان آماده‌است تا ظرفیت‌های لوژستیکی گسترده خود را برای ارائه کمک‌های بین‌المللی به کار ببندد.
این در حالی است که با تسلط طالبان بر افغانستان، تنش‌ها میان تاجیکستان و طالبان شدت گرفت و مقام‌های طالبان، تاجیکستان را متهم به مداخله در امور داخلی افغانستان کرده‌اند.
در پی این تنش‌ها، چندی پیش سازمان امنیت جمعی به رهبری روسیه، مانور نظامی شش روزه را در تاجیکستان در نزدیکی مرز با افغانستان راه اندازی کرد.
پس از این مانور نظامی، رزمایش نظامی مشترک چین و تاجیکستان نیز در نزدیکی مرز با افغانستان برگزار شد.
پیام ها