مقام‌های تاجیکستانی ادعا کرده‌اند که نقاط مرزی این کشور از خاک افغانستان مورد حمله موشکی قرار گرفته است.
به گزارش افغان نیوز؛ رسانه‌های تاجیکستانی، روز شنبه( ۱۷ ثور) به نقل از مقام‌های امنیتی این کشور گفتند که چهار موشک دست‌ساز از نوع BM-1 از ولسوالی خواجه‌غار ولایت تخار به سمت تاجیکستان شلیک شده است.
این رسانه‌ها به نقل از طالبان گفته‌اند که این کار داعش بوده است، اما مقام‌های محلی تاجیکستان در مرز افغانستان ادعا کرده‌اند که کار جماعت انصارالله، شبه‌نظامیان مخالف دولت این کشور، است.
براساس گزارش رسانه‌های تاجکیستانی، مرزبانان این کشور پس از شلیک موشک، به سوی آنان آتش گشودند که موتر حامل آنان سوخته است، اما به خودشان آسیبی نرسیده است.
گفته می‌شود این دومین حمله موشکی از خاک افغانستان به کشورهای آسیای مرکزی (اوزبیکستان و تاجیکستان) است. مسوولیت حمله موشکی بر اوزبیکستان را داعش بر‌عهده گرفته بود.
گفتنی است که جماعت انصارالله تاجیکستان تحت تحریم‌های تروریستی سازمان ملل متحد نیز قرار دارد.
پیام ها