وزارت امور داخله تاجیکستان اعلام کرده که قرار است بر اساس توافق این کشور با چین، رزمایش مشترک نظامی در بدخشان تاجیکستان در نزدکی مرز افغانستان برگزار شود.
به گزارش افغان نیوز؛ وزارت امور داخله تاجیکستان روز گذشته( شنبه، 8 عقرب) در بیانیه‌ای اعلام کرده است که گزارش‌ها مبنی بر ایجاد پایگاه نظامی چین در تاجیکستان و در نزدیکی خاک افغانستان نادرست بوده و چنین اقدامی در دستور کار این کشور نیست.
دربیانیه آمده‌است که در چارچوب توافقنامه همکاری بین وزارت داخله تاجیکستان و وزارت امنیت عمومی چین در زمینه زیرساخت‌های موجود تیم پولیس واکنش سریع و نهاد مبارزه با جنایات سازمان‌یافته قرار است رزمایش مشترکی در ولایت بدخشان تاجیکستان صورت گیرد.
رسانه دولتی تاجیکستان«خاور» در این زمینه گزارش داده است که تمامی ساز و برگ‌های نظامی و هزینه‌های لازم در زمان رزمایش مشترک توسط چین تامین و پرداخت می‌شود.
این در حالی است که چندی پیش سخنگوی پارلمان تاجیکستان گفته بود که چین قرار است هزینه ساخت یک پایگاه نظامی برای واحد نیروهای ویژه پولیس این کشور را در نزدیکی مرز با افغانستان تامین کند.
اما؛ اکنون وزارت داخله تاجیکستان گزارش‌ها درباره ساخت یک پایگاه نظامی توسط چین برای تاجیکستان در نزدیکی مرز با افغانستان را تکذیب کرده است.
پیام ها