پیمان امنیت جمعی که یک سازمان امنیتی به رهبری روسیه است، یک مانور نظامی بزرگ را در نزدیک مرز افغانستان با تاجیکستان راه اندازی کرده است.
به گزارش افغان نیوز؛ پیمان امنیت جمعی روز گذشته( دوشنبه، 26 میزان) با نشر اعلامیه‌ای از آغاز تمرینات نظامی بیش از 5 هزار سرباز در مرز افغانستان با تاجیکستان خبرداده گفته که قرار است این تمرینات تا روز شنبه، هفته آینده ادامه یابد.
وزارت‌های دفاع روسیه و تاجیکستان گفته اند که در این تمرینات بیش از ۵۰۰۰ سرباز اشتراک دارند که بیش از نیم آن‌ها را سربازان روسی تشکیل می‌دهند.
پیش از این مانور نظامی شش روزه، این سازمان امنیتی در ماه سپتمبر نیز تمرینات نظامی کوچکی را در منطقه مرزی تاجیکستان با افغانستان انجام داده بود.
براساس اعلامیه پیمان امنیت جمعی در این مانور به سربازان آموزش داده می‌شود که چگونه از ورود
غیرقانونی از مرز به داخل تاجیکستان جلوگیری نمایند.
پیمان امنیت جمعی زیر رهبری روسیه قرار دارد و شش جمهوری سابق اتحاد جماهیر شوروی پیشین اعضای آن می‌باشند.
بااین حال، تاجیکستان ۱۴۰۰ کیلومتر مرز مشترک با افغانستان دارد و برخلاف دیگر همسایه‌های شمالی افغانستان که در حال ایجاد روابط با طالبان اند، تاجیکستان با وضاحت گفته است که حکومت طالبان را به رسمیت نمی‌شناسد.
کشورهای عضو پیمان امنیت جمعی به ویژه تاجیکستان پس از قدرت گرفتن طالبان در افغانستان، از تاثیرات آن بر وضعیت امنیتی کشورهای آسیای مرکزی نگران اند.
پیام ها