سفیر تاجیکستان در دیدار با مشاور امنیت ملی کشور گفته است؛ ناامنی شمال افغانستان خطر جدی برای تاجیکستان نیست و نگرانی ها در این مورد کاهش یافته است.
به گزارش افغان خبر؛ شرف الدین امام اف، سفیر تاجیکستان در کابل با حنیف اتمر مشاور امنیت ملی دیدار کرد و روی مسائل امنیتی دو کشور گفت‌وگو نمود.
آقای امام اف؛ در دیدار با محمد حنیف اتمر گفت که نگرانی‌های امنیتی تاجیکستان از شمال افغانستان تاحدودی کاهش یافته است.
مشاور امنیت ملی نیز اظهار داشت که تروریزم تهدید مشترک برای کشورهای منطقه است و نیاز به مبارزه مشترک دارد.
چندی قبل نیز حنیف اتمر با سفر به تاجیکستان درباره مسائل مختلف از جمله امنیت در مرزهای دو کشور با مقامات تاجیک دیدار و گفت‌وگو کرده بود.
سال گذشته، سفارت تاجیکستان با ارسال نامه‌ای رسمی به وزارت امور خارجه افغانستان اعلام کرده بود که به دلیل ناامنی‌ها در شمال افغانستان، این کشور کنسولگری‌های خود در ولایت‌های «بدخشان» و «قندوز» را به صورت موقت تعطیل می‌کند.
خبرگزاری «ایتارتاس» سال گذشته مدعی شده بود که «حنیف اتمر» مشاور امنیت ملی، اشرف غنی رئیس جمهور افغانستان و «معصوم استانکزی» رئیس عمومی امنیت ملی جنگجویان داعش را به مرزهای تاجیکستان و ترکمنستان انتقال و حمایت می‌کنند.
بر اساس منابع ایتارتاس، جنگجویان داعش به وسیله بالگردهای نظامی ام17 به مرزهای تاجیکستان و ترکمنستان انتقال می‌یابند.
پیش از این ، «ظاهر قدیر» معاون اول مجلس نمایندگان، در سخنان خود در صحن علنی مجلس، نهادهای امنیتی از جمله شخص «حنیف اتمر» مشاور امنیت ملی، اشرف‌غنی رئیس جمهور کشور را متهم به حمایت از شکل‌گیری گروه تروریستی داعش کرده بود.
پیام ها