وزارت امور داخله کشور با اشاره به تمدید رخصتی برای سه‌هفته دیگر از شهروندان کابل می‌خواهد تا از گشت و گذار غیر ضروری خودداری کنند.
به گزارش افغان نیوز: در اعلامیه این وزارت آمده است که نظر به فیصلهٔ کابینهٔ جمهوری اسلامی افغانستان مبنی بر تمدید رخصتی برای سه‌هفته دیگر، قیود گشت و گذار درشهر کابل نیز تمدید می‌گردد.
وزارت امور داخله یکبار دیگر به باشنده‌گان شریف شهر کابل اطلاع می‌دهد تا از گشت و گذار غیر ضروری خودداری کنند در غیر آن مورد بازپرس جدی پولیس قرار می‌گیرند.
در اعلامیه آمده است که افراد زیر از قیود گشت و گذار در شهر کابل مستثنا می‌باشند:
1. کارمندان مقام عالی ریاست جمهوری،
2. کارمندان دفتر محترم شورای امنیت ملی،
3. کارمندان ریاست محترم عمومی اداره امور ریاست جمهوری،
4. وکلای محترم شورای ملی،
5. منسوبین وزارت محترم دفاع ملی،
6. منسوبین وزارت محترم امور داخله،
7. کارمندان وزارت محترم امورخارجه،
8. کارمندان وزارت محترم مالیه،
9. کارمندان وزارت محترم تحصیلات عالی،
10. کارمندان وزارت محترم صحت عامه،
11. منسوبین ریاست عمومی امنیت ملی،
12. کارمندان بخش های عدلی و قضایی،
13. کارمندان اداره محترم لوی سارنوالی،
14. کارمندان بخش‌های مخابراتی،
15. کارمندان اداره محترم ارگانهای محل،
16. کارمندان وزارت محترم مهاجرین،
17. معینان و روسای وزارت‌ها و ادارات مستقل دولتی،
18. کارمندان کمیته مبارزه با ویروس کرونا،
19. کارمندان موسسات خیریه،
20. کارمندان اداره محترم شاروالی،
21. کارمندان اداره محترم برشنا،
22. کارمندان هوا نوردی و شرکت‌های هوایی،
23. صرافان سرای شهزاده،
24. کارمندان بانک های خصوصی و دولتی،
25. کارمندان رسانه‌های آزاد و دولتی،
26. کارمندان و داکتران شفاخانه های دولتی و خصوصی به شمول دواخانه‌ها،
27. کارمندان اداره سره میاشت،
28. کارمندان واحد عملیاتی (شرکت انکشاف ملی)،
29. کارمندان شرکت‌های قرار دادی مواد اعاشوی سکتورهای امنیتی،
30. کارمندان شرکت محترم آبرسانی،
31. کارمندان فابریکه‌های تولید غذا، فروشنده‌گان مواد غذایی، ارتزاقی، خبازی‌ها، گازمایع و تانک‌های تیل.
به منظور پیش‌گیری از مصاب شدن به ویروس کرونا و پایان دادن به روزهای دشوار، همه کنارهم می‌ایستیم و همکار می‌باشیم. وزارت امورداخله از حوصله‌مندی شهروندان عزیز تشکر کرده و اطمینان می‌دهد که پولیس شب و روز در خدمت هموطنان خود می‌باشد.
پیام ها