رسانه‌های تاجیکستان از کشته شدن یک مقام امنیتی این کشور در درگیری با قاچاقچیان مواد مخدر خبر داده اند.
به گزارش افغا نیوز؛ نشریه ای‌کی‌آی پرس روز جمعه (۸ ثور) گزارش داده که رییس کمیته امنیت ملی ولایت خودمختار بدخشان، شامگاه پنج‌شنبه در جریان عملیاتی علیه فروشندگان مواد مخدر در مرز افغانستان کشته شده است.
بر اساس گزارش‌ها، کامران رجب‌زاده، رییس امنیت ملی ولایت خودمختار بدخشان تاجیکستان بوده که در درگیری با قاچاقچیان جان باخته است.
خبرگزاری دولتی تاجیکستان گزارش داده که گروه ۸ نفری قاچاقچیان مسلح از ولسوالی شغنان ولایت بدخشان افغانستان به مقصد انتقال مواد مخدر در حجم بزرگ، سلاح و لوازم جنگی از خط سرحد دولتی تاجیکستان و افغانستان قصد عبور داشتند.
طبق گزارش، در نتیجه‌ای درگیری سه قاچاقچی و یک عضو مرزبانی تاجیکستان کشته شده‌اند.
خبرگزاری خاور تاجیکستان نیز گزارش کرده پنج‌شنبه شب، از ورود غیرقانونی ۸ قاچاقچی مسلح از افغانستان به خاک تاجیکستان جلوگیری شده است.
این در حالی است که تاجیکستان همواره از ناامنی و قاچاق مواد مخدر مناطق مرزی با افغانستان ابراز نگرانی کرده است.
اما؛ امارت اسلامی همواره تاکید کرده که هیچ تهدیدی علیه کشورهای منطقه و جهان از خاک افغانستان وجود ندارد.
پیام ها