امضای توافقنامه تجاری میان افغانستان و تاجیکستان

مقامات افغانستان و تاجیکستان با هدف گسترش همکاری‎های بیشتر اقتصادی و تجاری تفاهمنامه همکاری امضا کردند.

مقام‌های بخش اقتصادی دو کشور امروز جمعه (۵ جوزا) در کابل اعلام کردند که سطح مبادلات تجاری میان تاجیکستان و افغانستان در یک سال گذشته دو برابر شده است.

عبدالستار مراد، وزیر اقتصاد کشورمان در مراسمی در کابل گفت که دو طرف توافق کرده‌اند در زمینه انرژی، نفت و گاز، آب، حمل و نقل، گمرک، مخابرات، مسایل فرهنگی و آموزش کارمندان دولتی افغانستان با هم بیشتر همکاری کنند.

خدایار خدایارزاده، وزیر حمل و نقل تاجیکستان در مراسم امضا این توافقنامه گفت که اجرای برنامه انتقال انرژی آسیای میانه به جنوب آسیا (کاسا ۱۰۰۰) و ساخت خط آهن میان چین - قرقیزستان - تاجیکستان -افغانستان -ایران و همچنین ساخت خط آهن تاجیکستان، افغانستان و ترکمنستان می‌تواند به توسعه افغانستان شتاب بیشتر بدهد.

آقای خدایار زاده گفت که افغانستان و تاجیکستان که کشورهای محصور در خشکی هستند و به آب‌های آزاد راه ندارند، ساخت این راه‌ها می‌تواند این دو کشور را کمک کند.

وزیر حمل و نقل تاجیکستان گفت که اکنون دوشنبه از صادر کنندگان عمده سیمان و برق به افغانستان است.

به گفته آگاهان، بعد از آن که روابط کابل و اسلام آباد به سردی گرایید، افغانستان، به تاجیکستان و سایر کشورهای آسیای میانه به عنوان معبری برای رسیدن به منابع انرژی و سایر اجناس مورد نیاز، از جمله گندم چشم دوخته است.

از سویی هم این کشورها افغانستان را گذرگاهی به آسیای جنوبی و آبهای آزاد می‌بینند.

با آن که میزان تجارت میان افغانستان و تاجیکستان افزایش یافته است اما قاچاق مواد مخدر تولیدشده در افغانستان از مسیر تاجیکستان به کشورهای اروپای شرقی و روسیه همچنان از چالش‌های قابل توجه است.

برخی کارشناسان مدعی هستند که مرزهای افغانستان و تاجیکستان در برابر نفوذ تندوران اسلام‌گرا هم به شدت آسیب‌پذیر است.

حضور هزاران جنگجو از آسیای میانه در عراق، سوریه و افغانستان، زنگ خطری را در تاجیکستان به صدا در آورده که ممکن است با شکست این تندوران در عراق و سوریه، تاجیکستان به خط مقدم نفوذ آنان تبدیل شود.