تاجیکستان اعلام کرده است که به‌دستور رئیس‌جمهور امامعلی رحمان، بیش از سه هزار تُن کمک بشردوستانه را برای آسیب‌دیدگان زلزله اخیر در شرق افغانستان ارسال کرده است.
به گزارش افغان نیوز: خبرگزاری «ترند» آذربایجان به نقل از نهاد ریاست‌جمهوری تاجیکستان گزارش کرده است که این کمک‌ها شامل ۲۴ نوع کالای اساسی است؛ از جمله مواد خوراکی، پوشاک، خیمه، مواد ساختمانی و غیره که به‌طور مجموع از سه هزار تُن فراتر می‌رود.
به نوشته منبع، نهاد یادشده خاطرنشان کرده است که این کمک «در راستای همدلی مردم تاجیکستان با همسایگان افغان‌شان است و بر سیاست انسانی و حسن همجواری تاجیکستان تأکید می‌کند.»
زلزله‌ای ویرانگر در تاریخ ۹ سنبله بخش‌های وسیعی از مناطق شرقی کشور، به ویژه ولایت کنر و ننگرهار را لرزاند.
براساس آخرین آمار امارت اسلامی، تا کنون بیش از دو هزار و ۲۰۰ نفر در این حادثه جان باخته و بالغ بر سه هزار نفر دیگر زخمی شده‌اند.
پیام ها