هشت کارگر افغانستانی که همگی باشندگان ولایت دایکندی بودند، در پی انفجار یک معدن زغال‌سنگ در ولسوالی «عینی» ولایت سغد تاجیکستان، جان خود را از دست دادند.
به گزارش افغان نیوز: منابع در ولایت دایکندی به رسانه‌ها گفته‌اند که این حادثه ساعت ۱:۳۰ پس‌ازچاشت روز جمعه (۱۹ ثور) در معدن زغال‌سنگ «سرکویی» رخ داده است.
ریاست آمادگی مبارزه با حوادث طبیعی ا.ا در دایکندی نیز این حادثه را تأیید کرده و گفته است که قربانیان همگی باشندگان ولایت دایکندی بوده و برای کار به تاجیکستان مهاجرت کرده بودند.
بر اساس خبرنامه این ریاست، از میان جان‌باختگان، پنج نفر از ولسوالی شهرستان، دو نفر از میرامور و یک نفر از اشترلی بودند.
در سال‌های اخیر، شمار زیادی از شهروندان افغانستان به‌دلیل بیکاری، ناامنی و وضعیت اقتصادی نامناسب، برای یافتن کار به کشورهای همسایه مانند ایران، پاکستان و تاجیکستان مهاجرت کرده‌اند.
بسیاری از این مهاجران به مشاغل سخت و پرخطر از جمله کار در معادن زغال‌سنگ و ساخت‌وساز روی می‌آورند، که غالباً فاقد تجهیزات ایمنی و شرایط کاری مناسب هستند.
پیش‌تر نیز حوادث مشابه در معادن ایران و پاکستان جان شهروندان افغانستان را گرفته بود.
پیام ها