نخست وزیر ازبیکستان در ملاقات با رییس اجراییه حکومت وحدت ملی وعده سپرد که کشورش در بخش تجارت و ترانزیت با افغانستان همکاری می‌کند.
به گزارش افغان نیوز: عبدالله عبدالله، رییس اجراییه جمهوری اسلامی افغانستان روز (دوشنبه ۱۰ سرطان) با عبدالله عارف‌اوف نخست وزیر جمهوری ازبیکستان و هیئت همراه ایشان در شهر مزار شریف ملاقات کرد.
در این نشست که به اشتراک اعضای کابینه ازبیکستان و افغانستان، تاجران و سرمایه‌گذاران دو کشور برگزار گردیده بود، دو طرف در باره توسعه روابط اقتصادی-تجارتی، همکاری‌های ترانزیتی و سرمایه‌گذاری صحبت کردند.
رییس اجراییه در این ملاقات خواست‌های تاجران و سرمایه‌گذاران افغانستان را که در ازبیکستان تجارت می‌کنند و یا سرمایه‌گذاری نموده‌اند مطرح کرد و خواهان رسیدگی به این خواست‌ها گردید.
نخست وزیر ازبیکستان در صحبت‌های خود اطمینان داد که کشورش با افغانستان در بخش تجارت، سرمایه‌گذاری و ترانزیت همکاری می‌کند و سهولت‌های لازم را برای تاجران افغانستان فراهم می‌سازد.
نخست وزیر ازبیکستان همچنان علاوه نمود که کشورش آماده است ذخیرگاه‌های مورد نیاز را برای ذخیره اموال تاجران در شهر مزارشریف بسازد و شرکت‌های قدیمی را نیز از نو بازسازی و به بهره‌برداری بسپارد.
نخست وزیر ازبیکستان همچنان در بخش انتقال کارگو، ساختن موتر، انتقال سنگ مرمر و دیگر اقلام تجارتی وعده همکاری داد.
رییس اجراییه به وزارت تجارت و صنعت و وزارت خارجه هدایت داد تا تمام موارد و وعده‌ها را در گروه‌های کاری مشترک دنبال و عملی سازند.
آقای عبدالله ضمن قدردانی از نخست وزیر ازبیکستان تاکید کرد که فرصت‌های توسعه روابط اقتصادی و سرمایه‌گذاری میان دو کشور فراهم است و باید از این فرصت‌ها استفاده گردد.
پیام ها