چین کمک‌های بشردوستانه خودبه آسیب دیدگان را، به مقامات افغانستان تحویل داد

یائو جینگ سفیر جمهور خلق چین درافغانستان هنگام تحویل دهی کمک‌های بشر دوستانه مردمش به مقامات افغان گفت؛ دولت افغانستان چند هفته قبل از جمهوری خلق چین درخواست کمک بشر دوستانه کرده بود که رئیس جمهور چین به طور عاجل ۲ میلیون دالر کمک بشردوستانه را به آسیب دیدگان حوادث طبیعی ولایت بدخشان فراهم کرد.

به گزارش خبرگزاری افغان نیوز؛ یائو جینگ سفیر جمهوری خلق چین امروز (یک شنبه 1 حوت) در هنگام تحویل دهی کمک‌های بشر دوستانه مردم و دولت اش به مقامات افغان گفت؛  "امروز من خیلی خوشحال هستم که بسته‌های کمکی به آسیب دیدگان ولایت بدخشان افغانستان را به مقامات این کشور تحویل می‌دهم".

آقای یائو جینگ افزود؛ رئیس جمهور خلق چین شی جین پینگ، لی‎ که‌چیانگ،نخست وزیر و وانگ یی وزیر امور خارجه جمهوری خلق چین پیام تسلیت خود رابه مردم و دولت افغانستان ابراز داشتند و برای کمک به آسیب دیدگان ولایت بدخشان به میزان 2 میلیون دالر امریکایی کمک ارسال کرده اند که امروز این کمک‌هادرمیدان هوای بین المللی حامد کرزی(کابل) تحویل مقامات افغانستان داده شد.

یائو جینگ بیان داشت: "من امیدوارم که جمهوری خلق چین به آسیب دیدگان دیگر ولایت های افغانستان نیز کمک بشردوستانه کند".

از سوی دیگر ویس برمک وزیر دولت در امور رسیدگی به حوادث که مسئولیت دریافت کمک های دولت چین را از طرف دولت افغانستان برعهده داشت، گفت؛  چین همیشه افغانستان را کمک کرده و امروز نیز به درخواست دولت افغانستان کمک دو میلیون دالر را به آسیب دیدگان ولایت بدخشان انجام داده است.

آقای برمک بیان داشت؛ جمهوری خلق چین در مدت دو سال اخیر هر بار که حوادث طبیعی در افغانستان رخ داده، کمک ها سریع و بشردوستانه خود را انجام داده است، که مردم و دولت افغانستان از این کشور دوست و همسایه قدردانی میکنند.

ویس برمک وزیر دولت در امور رسیدگی به حوادث گفت: کمک‌های جمهوری خلق چین به آسیب دیدگان ولایت بدخشان عبارت اند از 2300 خیمه، 4000 لیاف، 300 فرش، 3000 جنپر زمستانی و 3000 فرش روی خیمه می‌باشند.