رئیس جمهور غنی می‌گوید که افغانستان و تاجیکستان هیچ‌گونه اختلاف بنیادی ندارند و سرحد میان دو کشور باید به سرحد همکاری و همدلی مبدل گردد.
به گزارش افغان نیوز: محمد اشرف غنی، رئیس جمهور کشور، روز گذشته از سوی امام علی رحمان، رئیس جمهور تاجیکستان در قصر ملت، مورد استقبال قرار گرفت.
رئیس جمهور تاجیکستان در این دیدار گفت که همکاری و روابط میان دو کشور که دارای زبان، فرهنگ و تمدن مشترک اند، بر اصل برادری و حسن همجواری استوار است.
اشرف غنی همچتان گفت که آمدن ما به تاجیکستان، همیشه یک تجدید عهد برای توسعه مناسباتی است که هزاران سال سابقه دارد و دیدگاه وسیع همکاری را بنیان می‌گذارد.
رئیس جمهور غنی خاطرنشان کرد که افغانستان و تاجیکستان هیچ‌گونه اختلاف در موارد بنیادی ندارند و ما می‌خواهیم سرحد میان دو کشور به سرحد همکاری، هماهنگی و همدلی مبدل گردد.
آقای غنی همچنان در کنفرانس مشترک خبری، مناسبات میان افغانستان و تاجیکستان را نمونۀ همکاری، همسویی و منافع مشترک برای سایر کشورها خواند و آن را در سه بُعد دو جانبه، منطقوی و بین المللی تشریح کرد.
در همین حال، رئیس جمهور غنی به میدان دوستی در شهر دوشنبه پایتخت تاجیکستان رفت و در پای منار اسماعیل سامانی، اکلیل گل گذاشت.
این درحالی است که اشرف غنی، دیروز به منظور اشتراک در نهمین کنفرانس وزرای امور خارجۀ قلب آسیا- پروسۀ استانبول، عازم تاجیکستان شد.
پیام ها