محمدعمر آسوزاده، رییس شرکت ملی برق تاجیکستان می‌گوید که افغانستان تاکنون بدهی برق وارداتی خود را نپرداخته است.
به گزارش افغان نیوز؛ محمدعمر آسوزاده، رییس شرکت ملی برق تاجیکستان روز گذشته (سه‌شنبه، ۲۱ سرطان) در یک نشست خبری گفته است که شرکت برق افغانستان، بدهی خود را به‌گونه‌ی تدریجی می‌پردازد اما؛ او از مقدار بدهی افغانستان چیزی نگفته است.
او گفت که تاجیکستان در حال حاضر روزانه نُه میلیون کیلووات برق در ساعت به افغانستان صادر می‌کند.
رییس شرکت ملی برق تاجیکستان در ماه جنوری سال جاری میلادی اعلام کرده بود که افغانستان ۳۳ میلیون دالر از آن کشور بابت واردات برق بدهکار است.
این در حالی‌ست که شرکت برق رسانی افغانستان یا« برشنا» در آن زمان قول داده بود که بدهی برق خود را در ماه فبروری سال جاری به تاجیکستان پرداخت می‌کند.
طبق معلومات، تاجیکستان در سال گذشته در مجموع به هزینه‌ی ۵۶.۳ میلیون دالر برق به افغانستان صادر کرده است.
افغانستان به‌شدت متکی به برق وارداتی از کشورهای همسایه است که برخی از ولایت‌ها از جمله کابل همواره در فصل گرما و سرما با کم‌بود برق مواجه می‌شود. در این دو فصل سال، برق پایتخت افغانستان به‌گونه‌ی نوبتی توزیع می‌شود.
پیام ها