رییس جمهور تاجیکستان در دیدار با رییس اجراییه حکومت وحدت ملی گفت که کشورش آماده است افغانستان را در تمام‌عرصه‌ها همکاری نماید.
به گزارش افغان نیوز: عبدالله عبدالله، رییس اجراییه حکومت وحدت ملی دیروز (جمعه ۲۴ جوزا) برای اشتراک در نشست سران کنفرانس تعامل و اعتمادسازی در آسیا (سیکا) به تاجیکستان رفت و با امام علی رحمان رییس جمهور این کشور دیدار کرد.
عبدالله در این دیدار با بیان این که تاجیکستان از دوستان و متحدان نزدیک افغانستان است، خواهان افزایش دادوستد تجارتی و توسعه اتصال منطقه‌‌ای میان دو کشور شد.
وی از توجه و علاقمندی خاص رییس جمهور تاجیکستان به قضایای افغانستان و کمک به صلح و بازسازی این کشور سپاس‌گزاری کرد.
رییس اجرایی همچنان از همکاری تاجیکستان در مبارزه با دهشت‌افکنی و قاچاق مواد مخدر به نیکی یاد کرد و آمادگی افغانستان را برای همکاری در مبارزه با تهدیدهای مشترک ابراز داشت.
آقای عبدالله همچنان میزبانی اجلاس سران کنفرانس تعامل و اعتمادسازی در آسیا (سیکا) را برای رییس جمهور و مردم تاجیکستان تبریک گفت و ابراز امیدواری نمود که این اجلاس به دستاوردها و تصامیم ملموس در قبال قضایای مهم آسیا و منطقه دست یابد.
در همین حال، رییس جمهور تاجیکستان افغانستان را از دوستان و متحدان استراتژیک تاجیکستان خواند و علاوه کرد که روابط میان دو کشور مستحکم و استوار بر اصول و ارزش‌های مشترک تاریخی-فرهنگی می‌باشد.
امام علی رحمان در ادامه صحبت‌های خود گفت که کشورش خواهان صلح و ثبات در افغانستان می‌باشد و آماده است افغانستان را در تمام‌عرصه‌ها همکاری نماید.
رییس جمهور تاجیکستان صلح و ثبات در افغانستان را به نفع صلح و ثبات در منطقه و رشد و توسعه اقتصادی خواند و خواهان گسترش روابط تجارتی- اقتصادی میان دو کشور گردید.
پیام ها