نماینده ویژه رییس جمهور غنی در امور کشورهای مشترک المنافع از وظیفه اش برکنار و تشکیلات دفترش لغو شد.
به گزارش افغان نیوز: محمد اشرف غنی، رییس جمهوری افغانستان امروز با صادر کردن یک فرمان نوشت: «به تأسی از حکم فقره 13 ماده 64 قانون اساسی، عزل محمدشاکر کارگر، نماینده رییس جمهوری اسلامی افغانستان در امور کشورهای مشترک‌المنافع، همزمان با لغو تشکیل دفتر آن، منظور است».
در ادامه این فرمان آمده است: «تعیین، تقاعد، قبول استعفا، عزل قضات، صاحب منصبان قوای مسلح، پولیس و امنیت ملی و مأمورین عالی‌رتبه» از صلاحیت‌های رییس جمهوری می باشد.
آقای غنی در سال 2014 محمدشاکر کارگر را به عنوان نماینده ویژه‌اش برای تحکیم روابط دیپلماتیک با کشورهای روسیه، اوکراین، روسیه سفید (بلاروس)، گرجستان، آذربایجان، ازبکستان، تاجیکستان، ترکمنستان، قرغیزستان و قزاقستان گماشته بود.
تاکنون دلایل برکناری و لغو تشکیل دفتر محمدشاکر کارگر از سوی ریاست جمهوری اعلام نشده است.
این در حالی است که روز سه‌شنبه 19 فوریه وحید عمر، سفیر اسبق افغانستان در ایتالیا به عنوان مشاور ارشد رئیس جمهور غنی در امور روابط عامه و ستراتیژیک تعیین شد.
پیام ها