رییس جمهور تاجیکستان می‌گوید که جامعه بین‌الملل و کشورهای دخیل در قضایای افغانستان نسبت به مسائل این کشور تا کنون بی تفاوت بوده اند.
به گزارش افغان نیوز؛ امام علی رحمان، رییس جمهور تاجیکستان امروز( چهارشنبه، 17 سنبله) به مناسبت 30 سالگی استقلال کشورش صبحت کرده و گفته است که بی تفاوتی جامعه‌ی بین‌الملل و کشورهای دخیل به قضایای افغانستان، سبب بدتر شدن وضعیت در چند ماه گذشته در افغانستان شده است.
آقای رحمان وضعیت افغانستان را «فاجعه‌بار» خوانده و تاکید کرده است که این موضوع باعث نگرانی‌های جدی در منطقه و جهان خلق کرده است.
او گفته است: «خاطرنشان می‌کنم که برای به‌میان‌آمدن چنین وضع فاجعه‌بار مردم افغانستان با تاریخ و تمدن و فرهنگ چندین هزار ساله‌ی خود گناه ندارند. ناامنی و بدبختی که بر سر مردم این کشور باستانی آمده است، نتیجه‌ی دخالت کشورهای خارجی است».
رییس جمهور تاجیکستان نسبت به سکوت نهادهای حقوق بشری بین‌المللی در افغانستان ابراز تعجب کرده و گفته است که این نهادها هنوز هیچ ابتکار عملی برای حقوق مردم افغانستان روی‌دست نگرفته‌اند.
او تاکید کرده است که تاجیکستان از حکومتی در افغانستان حمایت می‌کند که همه‌شمول باشد و منافع تمامی مردم افغانستان را درنظر بگیرد.
به باور امام علی رحمان، مسئله افغانستان راه حل نظامی ندارد بلکه تنها مذاکره می‌تواند راه گشاه و حلال مشکلات این کشور باشد.
رییس جمهور تاجیکستان در حالی از حکومت به شمول در افغانستان سخن گفته است که شام روز گذشته طالبان اعضای سرپرست کابینه شان را اعلام کردند که در آن 33 نفر عضو کابینه طالبان اند.
پیام ها