وزارت خارجه روسیه در مورد تشدید تنش میان طالبان و تاجیکستان هشدار داده است که مسکو از دوشنبه با قاطع‌ترین اقدام حمایت می‌کند.
به گزارش افغان نیوز؛ ماریا زاخارووا، سخنگوی وزارت خارجه روسیه، گفته که در صورت تشدید اوضاع در مرز تاجیکستان و افغانستان، مسکو قاطع‌ترین اقدام را برای کمک به تاجیکستان انجام خواهد داد.
به گفته او، پایگاه نظامی ۲۰۱ روسیه در خاک تاجیکستان برای کمک به این کشور با مدرن‌ترین تجهیزات آماده است.
وزارت خارجه روسیه هفته گذشته از تاجیکستان و افغانستان خواسته بود که هر نوع اختلاف میان دو کشور را به طرز قابل قبولی حل کنند.
این وزارت گفته بود؛ براساس اطلاعاتی که طالبان به دست داده‌اند، ده‌ها هزار نیروی ویژه آنان به ولایت تخار در مجاورت تاجیکستان اعزام و مستقر شده‌اند.
این تنش پس اظهارات پی هم رییس جمهور تاجیکستان در مورد تشکیل دولت فراگیر در افغانستان بروز کرد.
طالبان تاکید امام‌علی رحمان را بر تشکیل دولت فراگیر در افغانستان مداخله می‌دانند.
ملا عبدالغنی برادر معاون اول رییس دولت سرپرست طالبان گفته است که تاجیکستان در امور داخلی افغانستان مداخله می‌کند. او هشدار داده که هر اقدامی واکنش نیز خواهد داشت.
پیام ها