عبدالله عبدالله، رییس اجراییه حکومت وحدت ملی به منظور شرکت در نشست سازمان شانگهای، عازم تاجیکستان شد.
به گزارش افغان نیوز: عبدالله عبدالله، رییس اجراییه حکومت وحدت ملی روز پنجشنبه (۱۹ میزان) برای شرکت در هفدهمین نشست سران کشورهای سازمان شانگهای به دوشنبه پایتخت تاجیکستان سفر کرد.
دفتر مطبوعاتی ریاست اجرایی با نشر خبرنامه‌ای گفته است که در این سفر صلاح‌الدین ربانی وزیر امورخارجه و تعدادی از مسئولین حکومتی، عبدالله عبدالله را همراهی می‌کنند.
آقای عبدالله، در اجلاس سران حکومت‌های سازمان شانگهای که سالانه برای ارزیابی وضعیت منطقه و سیاست‌های این سازمان برگزار می‌گردد، به نمایندگی از دولت افغانستان اشتراک و سخنرانی می‌کند.
رئیس اجرایی در حاشیه نشست سران حکومت‌های شانگهای با رئیس جمهور تاجیکستان، نخست وزیر فدراتیف روسیه، نخست وزیر چین، نخست وزیر ازبیکستان، نخست وزیر قزاقستان، نخست وزیر قرغیزستان، نخست وزیر تاجیکستان، نخست وزیر بلاروس و وزیر امور خارجه هند دیدار می‌کند.
ریاست اجرایی همچنان گفته است که عبدالله عبدالله در سخنرانی خود در این اجلاس و در دیدارهای خود با مقامات و نمایندگان کشورهای مختلف در حاشیه اجلاس در کنار موضوعات مختلف به طور عمده پیرامون نیاز مبرم مبارزه مشترک با دهشت‌افگنی، مبارزه با قاچاق مواد مخدر، گسترش همکاری‌و همگرایی منطقه‌ای، تطبیق برنامه‌های کلان منطقه‌ای، افزایش دادوستد بازرگانی و جلب حمایت کشورهای منطقه از روند صلح به مالکیت و رهبری افغانستان صحبت خواهد کرد.
پیام ها