رییس جمهور تاجیکستان در دیدا با رییس شورای عالی مصالحه ملی وعده سپرد که از تلاش‌های صلح و برقراری ثبات در افغانستان حمایت می‌کند.
به گزارش افغان نیوز: عبدالله عبدالله، رییس شورای عالی مصالحه ملی امروز سه‌شنبه(۲، جدی) از جریان سفرش به شهر دو شنبه نوشته است که امام علی رحمان، رییس جمهور تاجیکستان ابراز امیدواری نمود که تلاش‌های صلح تحت رهبری شورای عالی مصالحه‌ی ملی در افغانستان به پیروزی برسد.
امام علی رحمان، افغانستان را از دوستان و متحدین نزدیک تاجیکستان خواند و تاکید نمود که روابط دو کشور ریشه در همسایگی، مشترکات تاریخی، فرهنگی و دینی دارد.
آقای رحمان با اعلان حمایت همه جانبه‌ی کشورش، تلاش‌های صلح در افغانستان را صلح و ثبات در تاجیکستان، منطقه و فراتر از منطقه خواند.
رئیس جمهور تاجیکستان گفت: افغانستان، تاجیکستان و منطقه از تروریزم، افراط‌گرایی و بی‌ثباتی متضرر شده‌اند. تامین صلح و ثبات در افغانستان زمینه‌ی گسترش و توسعه‌ی تجارت و ترانزیت میان دو کشور، منطقه و اتصال آسیای مرکزی به جنوب آسیا را فراهم می‌سازد.
وی علاوه کرد: تاجیکستان دوست و متحد افغانستان است و از تلاش‌های صلح و تصمیم جمهوری اسلامی و مردم افغانستان در این عرصه حمایت می‌کند.
در همین حال، آقای عبدالله گفته است که روابط و دوستی میان دو کشور بر ارزش‌ها و مشترکات تاریخی، فرهنگی و دینی استوار است و مردم افغانستان از حمایت تاجیکستان در دوره‌های مختلف سپاس‌گزار اند.
وی در باره‌ی تلاش‌های صلح، مذاکرات دوحه، مرحله بعدی مذاکرات، سفرهای اخیر برای کسب اجماع منطقه‌ای و نقش جمهوری تاجیکستان در تأمین صلح در افغانستان صحبت نموده و تأکید نمود که جمهوری اسلامی افغانستان در مذاکرات صلح، به دست‌یافتن به صلح پایدار، عادلانه، باعزت و با حفظ ارزش‌های جمهوریت متعهد می‌باشد.
عبدالله از افزایش خشونت‌ها و جنگ به عنوان یکی از نگرانی‌های حکومت و مردم افغانستان در این مرحله نام برده و بر ختم جنگ و قطع خون‌ریزی در جریان مذاکرات تأکید نموده است.
این درحالی است که عبدالله عبدالله، رییس شورای عالی مصالحه ملی روز گذشته در راس یک هیات بلند رتبه دولتی به منظور جلب حمایت از تلاش‌های صلح، عازم شهر دوشنبه پایتخت تاجیکستان شد.
پیام ها