وزیر خارجه تاجیکستان با تأکید بر تشکیل دولت فراگیر در افغانستان، اعلام کرد که موضع دوشنبه در قبال طالبان تغییر نکرده است.
به گزارش افغان نیوز؛ سراج‌الدین مهر‌الدین، وزیر خارجه تاجیکستان، روز چهارشنبه (۱۲ دلو) در یک نشست خبری نیز گفت که خواست جامعه جهانی از طالبان تشکیل «دولت واقعآ فراگیر» است.
او ابراز امیدواری کرده که طالبان عملا آمادگی شان را برای مذاکرات با رهبران همه گروه‌های سیاسی و قومی به نمایش بگذارند.
وزیر خارجه تاجیکستان در رابطه با تامین امنیت مرز این کشور با افغانستان هم گفته است که کشورش برای تحکیم مرزهای جنوبی خود تدابیر ضروری را در نظر خواهد گرفت.
پیش‌تر، امامعلی رحمان، رییس جمهوری تاجیکستان در نشست مجازی کشورهای عضو «سازمان پیمان امنیت جمعی» پیشنهاد کرده بود که «یک کمربند امنیتی در اطراف افغانستان» ایجاد شود.
پس از روی‌کارآمدن طالبان، اقدامات نظامی تاجیکستان در مرز افغانستان افزایش یافته است.
این کشور ۲۰ هزار نیروی اضافی به مرز خود با افغانستان اعزام کرده است.
دوشنبه همچنین با متحدان خود مانورهای نظامی نیز در مرزهای شمال افغانستان انجام داده‌اند.
تاجیکستان تنها کشور در آسیای میانه است که آشکارا با ساختار فعلی دولت طالبان مخالفت کرده و هیچ ارتباطی با کابل هم ندارد.
پیام ها