محمد اشرف غنی، رئیس‌جمهور کشور و امام‌علی رحمان، رئیس‌جمهور تاجیکستان توافق کرده‌اند که هیأتی به ریاست محمد حنیف اتمر، سرپرست وزارت خارجه افغانستان به این کشور سفر و کارش را روی آجندای نشست هر دو رئیس‌جمهور آغاز کند.
به گزارش افغان نیوز: ارگ ریاست جمهوری با نشر اعلامیه‌ای گفته که سران دو کشور در این گفت‌وگوی تلفنی در مورد روابط دو جانبه، به‌ویژه تجارت، ترانزیت، تقویت همکاری‌های منطقه‌یی و افزایش همکاری‌ها در امتداد سواحل دریای آمو، صبحت کرده‌اند.
در این اعلامیه که امروز دوشنبه(3، سنبله) منتشر شده، به نقل از رئیس‌جمهور غنی آمده است که «سرحد افغانستان و تاجیکستان به نقطۀ دوستی و پیش‌رفت مبدل می‌گردد و نمونۀ دوستی و همکاری خوب میان دو کشور همسایه خواهد بود.»
بر اساس اعلامیه ارگ، رئیس‌جمهوری تاجیکستان از پروسۀ صلح به رهبری و مالکیت حکومت افغانستان حمایت کرده و وعده داده است که کشورش در نشست‌های منطقه‌یی و بین‌المللی، در کنار افغانستان خواهد بود.
اعلامیه افزوده که رئیس‌جمهوری تاجیکستان به‌خاطر گسترش روابط دو جانبه و چندین‌جانبه و توسعه همکاری‌ها، از آقای غنی دعوت کرده است که به این کشور سفر کند.
در این تماس تلفنی هر دو طرف توافق کرده‌اند که هیأتی به ریاست محمد حنیف اتمر، سرپرست وزارت خارجه به این کشور سفر و کارش را روی آجندای نشست هر دو رئیس‌جمهور آغاز کند.
در خبرنامه آمده که هیات افغانستان با هیات تاجیکستان در مورد مسایل سیاسی میان دو کشور، همکاری‌های اقتصادی و امنیتی، به‌ویژه مبارزه علیه تروریزم و مواد مخدر، گفت‌وگو خواهد کرد.
آقای غنی در حالی با همتای تاجیکی‌اش از طریق تلفن صحبت می‌کند که پنج روزی پیش، رئیس‌جمهوری تاجیکستان با مردمان این طرف رودخانۀ آمو از طریق بلندگو صبحت کرد و به آنان وعده همکاری داد.
پیام ها