دفتر مطبوعاتی معاونت اقتصادی ریاست‌الوزرای ا.ا اعلام کرده که یک هیأت بلندپایه به ریاست عبدالغنی برادر، معاون اقتصادی ریاست‌الوزرا، برای یک سفر رسمی دو روزه به تاشکند، پایتخت ازبیکستان، سفر کرده است.
به گزارش افغان نیوز: دفتر مطبوعاتی معاونت اقتصادی ریاست‌الوزرا، امروز (شنبه، ۴ حوت) با نشر خبرنامه‌ای گفته است که شماری از سرپرست وزیران حکومت، برادر را در این سفر همراهی می‌کنند.
براساس خبرنامه، در این سفر هدایت‌الله بدری، سرپرست وزارت معادن و پترولیم، حمیدالله آخوندزاده، سرپرست وزارت ترانسپورت و هوانوردی، نورالدین عزیزی، سرپرست وزارت صنعت و تجارت، عطاءالله عمری، سرپرست وزارت زراعت، آبیاری و مالداری، نور احمد آقای، رییس عمومی بانک مرکزی، عبدالمتین سعید، معین وزارت عواید و گمرکات وزارت مالیه حکومت سرپرست و شماری از مسوولان سکتورهای مختلف اقتصادی حضور دارند.
خبرنامه هدف از این سفر را توسعه روابط سیاسی، اقتصادی، بازرگانی و ترانزیتی میان این گروه و اوزبیکستان و جذب سرمایه‌گذاران اوزبیکستانی برای سرمایه‌گذاری در بخش‌های مختلف افغانستان اعلام کرده‌اند.
در این خبرنامه آمده که دو طرف در مورد تقویت روابطه در عرصه‌های یاد شده بحث و گفتگو خواهند کرد.
ازبیکستان از جمله کشورهای همسایه افغانستان است که در بیش از سه سال گذشته روابط اقتصادی و سیاسی نزدیکی با کابل برقرار کرده است.
پیش از این، عبدالغنی برادر، معاون اقتصادی ریاست‌الوزرای حکومت سرپرست، با یک هیأت بلندپایه به ایران سفر کرده بود.
پیام ها