ر‌وسای جمهور افغانستان و تاجیکستان در یک تماس تلفنی، روند نگران کننده اوضاع نظامی و سیاسی در افغانستان را بررسی کردند.
به گزارش افغان نیوز؛ محمد اشرف غنی، رییس‌جمهور کشور، روز یک‌شنبه (۱۳، سرطان) در تماس تلفنی با امام‌علی رحمان، رییس‌جمهور تاجیکستان، در باره‌ی وضعیت افغانستان گفتگو کرده است.
در این تماس تلفنی، دو طرف در باره‌ی شماری از شهروندان افغانستان که به دلیل ادامه‌ی جنگ، از طریق مناطق مرزی به تاجیکستان پناه برده اند، صحبت کرده اند.
امام‌علی رحمان، رییس‌جمهور تاجیکستان، وضعیت پیش‌آمده در افغانستان را نگران‌کننده خوانده است.
در همبن حال، رییس‌جمهور غنی، با اشاره به حس بشردوستانه‌ی تاجیکستان در برابر شهروندان افغانستان، گفته است: «دولت افغانستان در قبال شهروندانش مسؤول است و به زودترین فرصت، اقدامات لازم و فوری را برای رسیدگی به آن‌ها انجام خواهد داد.»
این در حالی است که خبرگزاری خاور تاجیکستان، روز شنبه(۱۲، سرطان) گزارش داد که بیش‌تر از ۳۰۰ تن از نیروهای امنیتی افغانستان، پس از درگیری با جنگ‌جویان طالب در ولایت بدخشان، به تاجیکستان عقب‌نشینی کرده اند.
گفته می‌شود چند روز پیش نیز، ۱۳۴ نفر از نیروهای امنیتی افغانستان، از طریق شیرخان‌بندر در ولایت کندز، وارد خاک تاجیکستان شدند.
پیام ها