ولادی‌میر پوتین، رییس‌جمهور روسیه و امام‌علی رحمان، رییس‌جمهور تاجیکستان در مورد افزایش تحرک طالبان در مناطق مرزی گفتگو کردند.
به گزارش افغان نیوز؛ کاخ کریملین اعلام کرده که این گفت‌وگوی تلفنی پس از چاشت دیروز (دوشنبه، چهاردهم سرطان) صورت گرفته است.
بر اساس خبرنامۀ کاخ کریملین، وضعیت امنیتی در مرز میان افغانستان و تاجیکستان موضوع بحث روسای جمهور روسیه و تاجیکستان بوده است.
در این خبرنامه آمده است که رییس‌جمهور روسیه برای هر نوع حمایت نظامی از تاجیکستان به هدف تأمین امنیت مرزهای جنوبی این کشور اعلام آماده‌گی کرده است.
این در حالی است که به تازگی، دولت تاجیکستان بیش از ۲۰ هزار سربازش را در مرزهای این کشور با افغانستان مستقر کرده است.
این اقدام پس از آن روی دست گرفته شده که اخیراً چندین ولسوالی در ولایت‌های تخار، بدخشان و کندز به تصرف طالبان درآمده و صدها سرباز افغانستان به خاک تاجیکستان متواری شدند.
پیام ها