وزارت خارجه روسیه اعلام کرد که مسکو از تاجیکستان و طالبان خواسته است تا اختلاف‌های شان را به شیوه‌ای قابل قبول برطرف کنند.
به گزارش افغان نیوز؛ امامعلی رحمان، رییس جمهور تاجیکستان از به رسمیت شناختن کابینه مشخص شده از سوی طالبان در کابل خودداری کرده است.
این کشور همچنین محاصره ولایت پنجشیر از سوی نیروهای طالبان را نقض حقوق بشر توصیف کرده است.
با این حال، طالبان روز دوشنبه گذشته درباره دخالت در امور داخلی افغانستان هشدار داده است.
الکسی زایتسف سخنگوی وزارت خارجه روسیه به خبرگزاری دولتی تاس گفته است: «ما با نگرانی شاهد افزایش تنش‌ها در روابط تاجیکستان و افغانستان در میان بیانیه‌های شدید الحن دو جانبه رهبران دو کشور هستیم.»
وی تصریح کرد که «طبق اطلاعات منتشر شده از سوی طالبان، ده‌ها نیروی جنگی در ولایت تخار در شمال شرقی افغانستان و در مجاورت تاجیکستان مستقر شده‌اند.»
خبرگزاری تاس به نقل از بلال کریمی یکی از سخنگویان طالبان ادعا کرد که آن‌ها هیچ استقرار نیرویی در نزدیکی مرز با تاجیکستان نداشته‌اند.
تاجیکستان که میزبان پایگاه نظامی روسیه است، روزهای چهارشنبه و پنجشنبه در دو ولایت هم مرز با افغانستان رژه نظامی برگزار کرد.
پیام ها