عبدالله عبدالله، رییس اجراییه حکومت وحدت ملی در یک سفر رسمی دو روزه به دعوت صدراعظم جمهوری تاجیکستان، وارد شهر دوشنبه گردید.
به گزارش افغان نیوز: عبدالله عبدالله، رییس اجراییه جمهوری اسلامی افغانستان جهت اشتراک در کنفرانس بین‌المللی تحت عنوان "آب برای توسعهی پایدار" و به دعوت رسمی صدراعظم جمهوری تاجیکستان در رأس یک هیأت بلندپایۀ دولتی، امروز چهارشنبه، 30 جوزای 1397 وارد شهر دوشنبه گردید.
رییس اجراییه کشور، افزون بر سخنرانی در کنفرانس بین‌المللی "آب برای توسعهی پایدار" که هدف آن استفاده خوب و مدیریت آب برای توسعهی پایدار است، با امام علی رحمان، رییس جمهور، قاهر رسول‌زاده، صدراعظم و رییس پارلمان جمهوری تاجیکستان دیدار و ملاقات می‌کند.
آقای عبدالله در حاشیه این سفر با رییس جمهوری ترکمنستان، رییس جمهوری اسلامی پاکستان و تعداد دیگر از مقامات این کشور نیز دیدار می‌کند.
در این سفر، موافقتنامه‌‌ی همکاری در عرصه‌ی مخابرات، یادداشت تفاهم همکاری در زمینه‌ی معادن و اعلامیه مشترک میان مقامات جمهوری اسلامی افغانستان و جمهوری تاجیکستان به امضا می‌رسد و هر دو طرف روی گسترش روابط دوجانبه، تقویت همکاری‌های امنیتی، اقتصادی، اجتماعی، فرهنگی، تجارت، ترانزیت و مبارزه مشترک با تروریزم بحث و گفتگو می‌کنند.
قابل ذکر است که ویس احمد برمک وزیر امور داخله، شهزادگل آریوبی وزیر مخابرات، حکمت خلیل کرزی معین سیاسی وزارت امور خارجه ، محمد گل خلمی معین وزارت انرژی و آب، محمد اسماعیل رحیمی معین وزارت اقتصاد و میرجاوید سادات معین وزارت معدن و پطرولیم رییس اجراییه کشور را همراهی می‌کنند.
پیام ها