دکتور عبدالله عبدالله رییس اجراییه کشور بعد از یک سفر رسمی دو روزه به تاجیکستان شام پنجشنبه دو باره به کابل برگشت، در جریان این سفر چندین توافق نامه میان مقام های دو کشور به امضا رسید.
به گزارش افغان نیوز: رییس اجراییه در این سفر رسمی که به دعوت رسول قاهرزاده نخست‌وزیر تاجیکستان صورت گرفته بود در روز نخست سفر در همایش بین‌المللی "آب برای توسعه‌‌ی پایدار" به نمایندگی از افغانستان سخنرانی کرد.
در این سفر رییس اجراییه کشور با امام علی رحمان رییس جمهور، قاهر رسول‌زاده صدراعظم و آقای شکورجان ظهور اوف رییس مجلس نمایندگان تاجیکستان به صورت جداگانه دیدار و گفتگو کرد.
رییس اجراییه کشور در حاشیه‌ی این سفر با قربانقلی بیردی محمدوف رییس جمهوری ترکمنستان و ممنون حسین رییس جمهوری پاکستان دیدار نمود.
در این سفر موافقتنامه‌‌ی همکاری در عرصه‌ی مخابرات، یادداشت تفاهم همکاری در زمینه‌ی معادن و اعلامیه مشترکی میان مقامات افغانستان و تاجیکستان به امضا رسید و هر دو طرف روی گسترش روابط دوجانبه، تقویت همکاری‌های امنیتی، اقتصادی، اجتماعی، فرهنگی، تجارت، ترانزیت و مبارزه مشترک با تروریزم بحث و گفتگو کردند.
رییس اجراییه در این سفر همچنان در میدان دوستی در پای منار شاه اسماعیل سامانی اکلیل‌گل گذاشت و در آخرین روز سفر خود از بندبرق راغون نیز دیدن نمود.
در میدان هوای بین‌المللی دوشنبه خدایار خدایارزاده وزیر ترانسپورت جمهوری تاجیکستان، نظام‌الدین زاهدی معین وزارت امورخاجه تاجیکستان، زبیدزاده محمدسعید معاون شهرداری دوشنبه، شارژدافیر سفارت افغانستان در تاجیکستان و دپلومات‌های کشور برای خداحافظی با رییس اجراییه حاضر شدند.
در این سفر وزیر امور داخله ویس احمد برمک، وزیر مخابرات شهزادگل آریوبی، معین سیاسی وزارت امور خارجه حکمت خلیل کرزی، معین وزارت انرژی و آب محترم محمد گل خلمی، معین وزارت اقتصاد محمد اسماعیل رحیمی و معین وزارت معدن و پطرولیم میرجاوید سادات رییس اجراییه کشور را همراهی می‌کردند.
پیام ها