عبدالله عبدالله، رییس اجراییه حکومت وحدت ملی صبح امروز سه شنبه(۲، دلو) برای شرکت در مجمع جهانی اقتصاد وارد داووس سویس گردید.
به گزارش افغان نیوز: در اعلامیه ریاست اجراییه آمده است که آقای عبدالله در افتتاح اجلاس مجمع اقتصادی جهان اشتراک و در چندین نشست در باره افغانستان، منطقه و جهان سخنرانی می‌کند. رییس اجراییه در نخستین روز کاری مجمع اقتصادی در نشست «صلح و آشتی در جهان چند قطبی» و «آخرین تحولات استراتیژیک در جنوب آسیا» صحبت می‌نماید. همچنان در جریان اقامت خود در داووس در چندین نشست و بحث‌های مجمع در مورد افغانستان، منطقه و جهان اشتراک می‌کند.
آقای عبدالله در مجمع اقتصادی جهان داووس با تعدادی از نخست وزیران، رووسای سازمان‌های بین‌المللی، نمایندگان عالی رتبه‌کشورها، سازمان‌های بین‌المللی و شخصیت‌های بین‌المللی دیدار می‌کند.
رییس اجراییه کشور در جریان اقامت خود همچنان با تعدادی از رسانه‌های بین‌المللی و ژورنالستان در باره آخرین تحولات افغانستان مصاحبه و صحبت می‌نماید.
اجلاس مجمع اقتصادی جهان امسال به اشتراک بیش از ۳۰۰۰ تن تاجر، سیاست‌مدار، نمایندگان حکومت‌ها، نهادهای بین‌المللی و جامعه مدنی به مدت پنج روز ادامه می‌یابد.
در این اجلاس قضایای مهم اقتصادی، سیاسی، تغییرات اقلیم در سطح جهان و چگونگی همکاری میان کشورها، سازمان‌های بین‌المللی و سازمان‌ها و نهادهای اقتصادی در عصر جهانی شدن به بحث گرفته می‌شود.
پیام ها